3. - 6. mars 2022

Sandane

Vi gler oss til å ønske velkomen til Ose Kammerspel 2022! Og ikkje minst er vi stolte over å kunne presentere ei imponerande liste med artistar som har takka ja til å besøke festivalen vår:

Henning Kraggerud og Edvard Erdal, fiolin

Andreas Brantelid, cello

Eric Lu og Christian Ihle Hadland, piano

Ingrid og Maria Ose, fløyte

Jostein Gaarder, forfattar

Kjersti Eliassen, akvarellar

Vi set opp heile Henning Kraggerud sitt fantastiske verk Equinox, der Kraggerud har komponert musikken og Jostein Gaarder har skreve teksten. Equinox betyr jamndøgn. Dette døgnet er natt og dag like lange - dei lyse og mørke kreftene i balanse -  og det er nettopp på denne dagen Jostein Gaarder si historie utfaldar seg. I Equinox legg vi ut på ei musikalsk reise gjennom 24 tonearter, kvintsirkelen rundt. Hovudpersonen er i ei svært vanskeleg situasjon, han ventar nemleg på ei nevrologisk diagnose. Midt på dagen tumler han ut i Greenwich Park der han blir slynga ut i ei kaleidoskopisk reise til alle dei 24 tidssonene, ein for kvar 15. lengdegrad. 

Equinox består av fire delar; Ettermiddag, Kveld, Natt og Morgen. På kvar konsert får vi ein ny del fra Equinox i tillegg til meisterverk av kjende komponister frå musikkhistoria. Equinox fekk strålande kritikkar etter urframføringa i 2014, og musikken blei beskrive som vakker, sørgmodig, sprudlende og hjerteskjærende. På Ose Kammerspel skal musikken framførast av Henning Kraggerud, Christian Ihle Hadland, og Ingrid og Maria Ose, og teksten lesast av Jostein Gaarder. I tillegg har kunstnaren Kjersti Eliassen malt fantastiske akvareller inspirert av både teksten og musikken.

Her kan du høre Jostein Gaarder, Henning Kraggerud og Arktisk Filharmoni framføre Equinox del 1.

At vi får besøk av sjølvaste Jostein Gaarder er noko vi er ekstremt stolte over. Gaarder har hatt ein eineståande suksess med romanen Sofies verden, som er oversatt til over 60 språk og har solgt over 50 millionar eksemplar verda over. Dette er den største suksessen i norsk litteraturhistorie nokonsinne. Han har mottatt ein lang rekke prisar, både norske og internasjonale, og Sofies verden har blitt både film, musikal, TV-serie og teater. Han er æresdoktor ved Universitetet i Dublin, og er utnemd til Kommandør av St. Olavs Orden. Karakteristisk ved Jostein Gaarders forfatterskap er stor nysgjerrigheit over dei mange gåtene i livet, og med smittande begeistring og forførande engasjement stimulerer han til auka interessa for filosofi både blant vaksne og ungdom når han stiller sentrale spørsmål om oss sjølv og vår plass i verda. 

I tillegg til å lese sin eigen tekst under Equinox-konsertane, får vi møte Gaarder på Gloppen Folkebibliotek torsdag 3. mars. Der skal han fortelle om og lese frå den nye boka si Det er vi som er her nå, og festivalmusikarane vil krydre litteraturprogrammet med vakker musikk. 

Ose Kammerspel har tatt initiativ til eit samarbeid mellom Kraggerud, Gaarder og den Oslo-baserte kunstnaren Kjersti Eliassen rundt verket Equinox. Eliassen har hatt ei rekke utstillingar både i Noreg og i utlandet, og har hausta stor begeistring for sine fantastiske akvarellar. Ho har malt akvarellar til heile Equinox, og bileta hennar vil visast både under konsertane og i tillegg stå som ei eiga utstilling under heile festivalen i Trivselshagen. Dette samarbeidet vil leve vidare også etter Ose Kammerspel, og skal vere ein del av Aulaseriene i Oslo i april, både i Universitetets Aula i Oslo og på Ramme Gård.

Stjernepianisten Eric Lu spelar konsertar verda over, både aleine og som solist med dei fremste symfoniorkestra. Han skal m.a. vere solist med Oslo-Filharmonien og Arktisk Filharmoni i 2022. Etter han vann den store internasjonale pianokonkurransen i Leeds i 2018, har karriera hans verkeleg tatt av, og han er i dag ein av verdas fremste unge pianistar. Vi blei heilt bergtatt da vi hørte han spele Chopin sin Funeral March på konkurransen i Leeds, og gler oss vilt til han skal spele den i Trivselshagen på Sandane. 

Andreas Brantelid, cello, er ein av Skandinavias mest ettertrakta musikarar. Han hadde sin debut med Royal Danish Orchestra allereie som 14 åring, og i 2006 vant han Eurovision Young Musician Contest. Han har ei omfattande karriere som orkestersolist og kammermusikar verda over, og har mottatt ei rekke prisar for sitt fantastiske cellospel. Han er også ein av dei kunstneriske leiarane for Stavanger Kammermusikkfestival saman med Christian Ihle Hadland.

Christian Ihle Hadland er ein fremragande pianist, og spelar ofte saman med både Henning Kraggerud og Andreas Brantelid. Han besøkte Ose Kammerspel på den første festivalen vår, og publikum visste verkeleg å setje pris på han da. Hadland har motteke ei rekke prisar både i inn- og utland, m.a. Den Norske Solistpris, Shellprisen to gongar og Kjell Bækkelunds ærespris. Han har vore solist med alle dei norske symfoniorkestra, og særlig begeistra han både publikum og norsk presse med sin debut med Oslo-Filharmonien i 2005. Han har også gitt ut ei rekke CDar som har fått strålande kritikkar både av norske og internasjonale medier. Vi gler oss veldig til å ha han på besøk igjen, og spesielt til å høyre han spele 4-hendig saman med Eric Lu i Schuberts fantastiske Lebensstürme. 

Fiolinisten Edvard Erdal er Konsertmester 2 i Den Norske Opera og Ballett i Oslo, og har etablert seg som ein svært ettertrakta kammermusikar og orkesterleiar. Han besøkte akkurat Gloppen Musikkfest som ein av musikarane i Det Norske Kammerorkesteret, og han er også fiolinist i den fremadstormande strykekvartetten Opus13. Erdal spelar jamnleg på festivalar i inn- og utland, og har spelt m.a. med verdskjende musikarar som Janine Jansen og Leif Ove Andsnes. Edvard Erdal er ein strålande fiolinist med eit varmt og inderleg uttrykk, og vi er glade for å kunne presentere han på festivalen vår denne gangen.

Henning Kraggerud er ein av Noregs aller fremste musikarar, og har vore på Ose Kammerspel to gongar tidlegare. Han har begeistra og imponert både oss og publikum på Sandane med sine eineståande tolkningar, sin unike energi og sitt smittende engasjement, og vi er glade for å ha han med oss også i 2022.

Vi ynskjer varmt velkomne til Ose Kammerspel 3. - 6. mars 2022!

-Ingrid og Maria Ose

kunstneriske leiarar